Timo Werner oo 25 jir ah, ayaa u dhaqaaqay kooxda Chelsea xagaagii hore, isagoo kaga soo dhaqaaqay naadiga reer Germany ee RB Leipzig aduun dhan 53 milyan oo euro.
Laakiin Timo Werner ayaan soo bandhigin waxqabadkii laga filayay inuu ka qabto Chelsea xilli ciyaareedkii lasoo dhaafay, isagoo dhaliyay kaliya 12 gool 52 kulan oo uu la ciyaaray Blues.
Haddaba Karlheinz Förster oo ah wakiilka Timo Werner ayaa wareysi uu bixiyay wuxuu kaga hadlay mustaqalka laacibka reer Germany, sida laga soo xigtay “Sport1”, waxaana hadaladiisa ka mid ahaa:
“Qaar ka mid ah kooxaha waa weyn ee Yurub ayaa doonayay saxiixiisa, oo ay ku jirto Bayern, laakiin ugu dambeyn wuxuu go’aansaday inuu ku biiro Chelsea.”
“Ku laabashada la shaqeynta Nagelsmann ee Bayern? Waxba kama fogeyn kartid, laakiin haddii aan qiimeyn lahaa waqtigaan, waxaan si cad u dhihi lahaa wuxuu sii joogayaa Chelsea.”
“Wuxuu ku dareemayaa raaxo halkaas, laakiin ma aqaano wali waxa dhici doona seddex ama afar sano kaddib.”
