Dhoobley(Idaacadda Sanguuni)-Difaaca bidix ee Liverpool, Andy Robertson, ayaa amaanay xiddiga reer Jarmal Florian Wirtz kadib markii kooxdu ay 5-1 ku xasuuqday Eintracht Frankfurt ciyaar ka tirsan Champions League.
Robertson ayaa yiri:“Waxaan u maleynayaa inuu ahaa mid cajiib ah, heerkiisuna wuu sii kordhay ciyaarta gudaheeda, gaar ahaan qeybtii labaad.
Ciyaartoydii ku hareeraysnaa ayaa si weyn u caawiyay – Curtis Jones wuxuu ahaa mid heer sare ah – saddexda khad dhexe ayaana naga caawiyay inaan gacanta ku hayno kubadda oo aan xoojino cadaadiska.
Flo (Wirtz) wuxuu ahaa mid aad u wanaagsan tan iyo markii uu yimid halkan. Dadku waxay diiradda saaraan tirada goolasha iyo caawinta, balse mararka qaar taasi waa cadaalad darro, sababtoo ah wuxuu abuuray fursado aad u badan. Arbacadii, qaar ka mid ah fursadahaas ayaa isu beddelay caawin rasmi ah, taasna waa mid dhiirrigelin u ah isaga.
Wirtz ayaa kulankaas diiwaangeliyay laba caawin, taas oo ahayd markii ugu horreysay ee uu si toos ah gool ugu lug yeesho intii uu joogay Liverpool.
Hadda, xiddiga qaranka Jarmalka ayaa u baahan inuu bilaabo sameynta saameyn la mid ah Premier League, halkaas oo uu ilaa hadda ka ciyaaray siddeed kulan balse uusan weli gool dhalin ama caawin.
