Dhoobley(Idaacadda Sanguuni)-Tababaraha xulka qaranka Portugal, Roberto Martinez, ayaa hadal muran dhaliyay ka jeediyay warbaahinta kadib markii uu si buuxda uga tagay magaca xiddiga Barcelona Pedri, isagoo sheegay in Vitinha uu yahay ciyaaryahanka khadka dhexe ee ugu fiican adduunka.
Martinez ayaa yiri: “Aniga ahaan, Vitinha waa ciyaaryahanka khadka dhexe ee ugu fiican dunida. João Neves isna waa mid ka mid ah kuwa ugu wanaagsan, inkasta oo uu leeyahay astaamo ka duwan.”
Tababaraha ayaa ku daray: “Haddii aan u eegno tiro ahaan, waa Vitinha. Xilli ciyaareedkii hore, wuxuu ahaa ciyaaryahankii khadka dhexe ee ugu fiicnaa Champions League. Waa inaan aqbalnaa aragtiyo kala duwan, laakiin sidoo kale waa inaan taageernaa xaqiiqooyinka.”
Hadalka Martinez ayaa u muuqda mid ay ku jirto eex qarsoon, maadaama labada ciyaaryahan ee uu ammaanay — Vitinha iyo João Neves — ay yihiin reer Portugal isla markaana ay koox ahaan u wada ciyaaraan Paris Saint-Germain (PSG).
Si kastaba ha ahaatee, tirakoobyadu waxay taageerayaan hadalka Martinez. Vitinha ayaa ku dhammeeystay kaalinta saddexaad ee abaalmarinta Ballon d’Or 2025, isagoo ka dambeeyay Ousmane Dembélé iyo Lamine Yamal, halka Pedri uu galay kaalinta 11-aad.
Tani waxay sii kicisay doodda ku saabsan ciyaaryahanka khadka dhexe ee ugu sarreeya Yurub, iyadoo taageerayaasha Barcelona ay durba ku eedeeyeen Martinez inuu si ula kac ah u dhayalsaday saameynta Pedri ee garoonka.
