Dhoobley(Idaacadda Sanguuni)-Warbaahinta Isbaanishka ah ee Defensa Central ayaa xaqiijisay in Florentino Pérez, madaxweynaha Real Madrid, uu si rasmi ah uga baxay fikradda ah in kooxda ay la saxiixato xiddiga khadka dhexe ee Manchester City, Rodri, mustaqbalka dhow.
Warbixinta ayaa tilmaamaysa in Pérez uu aaminsan yahay in qiimaha sare ee la filayo in lagu helo Rodri uusan ahayn mid macquul ah, maadaama ciyaaryahanku uu dhawaanahan la daalaa dhacayay dhaawacyo isdaba joog ah — arrin keentay in maamulka Madrid ay shaki geliyaan in maalgelinta lagu samayn karo ay mudan tahay in la hakiyo.
Rodri ayaa loo arkaa mid ka mid ah khad dhexe-yaasha ugu fiican kubadda cagta adduunka, waxaana magaciisa lala xiriiriyay Real Madrid bilihii la soo dhaafay si uu u xoojiyo khadka dhexe ee kooxda. Si kastaba ha ahaatee, duruufaha dhaqaale iyo xaaladda jirkiisa ayaa sabab u noqday in kooxda boqortooyada ay joojiso qorshahan.
Xiddiga reer Spain ayaa heshiis kula jira Manchester City ilaa xagaaga 2027, waxaana warbixinno hore sheegeen in heshiiskiisu ku kacayo ilaa 100 milyan oo euro, xilli uu Rodri la tacaalayo dhaawacyo soo noqnoqday isla markaana uu dhow yahay da’da 30 sano.
