Dhoobleey(Idaacadda Sanguuni). Sida wararku ay sheegaan mustaqbalka Macallin Carlo Ancelotti ee Kooxda Real Madrid ayaan sal fadhiya lahayn, iyadoo durba la ogaaday tababaraha ay doonayso inay ku beddesho Carlo.
Los Blancos ayaa doonaysa inay Tababaraha reer Talyaani ee Carlo Ancelotti ay ku beddesho Macallin reer Jarmal ee Joachim Low.
Mustaqbalka Carlo Ancelotti ee Kooxda Real Madrid ayaan wali la hubin, inkastoo ay kooxdiisu si xooggan ugu jirto tartanka horyaalka La Liga iyo kan Koobka kooxaha Yurub ee Champions League.
Warsidaha El Nacional ayaa ku warramaya in Madaxweynaha Real Madrid ee Florentino Perez uu weli qorsheynayo inuu ceyriyo Macallinka reer Talyaani ee Carlo Ancelotti.
Sida warbixinta lagu sheegay Perez ayaa doonaya inuu booska Ancelotti u magacaabo tababarihii hore ee xulka qaranka Jarmalka ee Joachim Low.
Real Madrid ayaa haatan horyaalka La Liga ku hoggaaminaysa 12 dhibcood oo saafi ah, halka Macallin Carlo xalay oo ugu dambeysay uu kooxdiisa Los Blancos u soo saaray afar dhammaadka UEFA Champions League.
