(London) 19 Sebt 2020. Tababaraha kooxda Arsenal ee Mikel Arteta ayaa marmarsiyo u sameeyay sababta uu xiddiga reer Gabon ee Pierre-Emerick Aubameyang isaga diiday inuu ku biiro naadiga Barcelona.
Arsenal ayaa caawa ku soo dhaweyn doonto garoonkeeda Emirates kooxda West Ham United, ciyaar ka tirsan kulamada Isbuuca labaad horyaalka Premier League ee xilli ciyaareedkan cusub 2020/21.
Haddaba “Daily Mail” ee dalka England ayaa soo xigtay wareysi uu bixiyay Tababaraha kooxda Arsenal ee Mikel Arteta, waxaana hadaladiisa ka mid ahaa:
“Waxaan u maleynayaa in sababta ugu weyn uu ku joogay Aubameyang ay tahay inaan heysano koox fiican”.
“Waxaan heysanaa shaqsiyaad wanaagsan oo halkaan ka shaqeeya, waxayna dareemayaan jacaylka taageerayaasha”.
“Waxaan ka qaatay qeybteyda, waxaana u sharaxay waxa aan isku dayeyno inaan sameyno, sida ay muhiim u tahay, iyo waxa aan dhiseyno, kooxda waa inay kaheshaa waxa ay ugu qalanto”.
Mar wax laga weydiiyay xiisha ay ka muujiyeen kooxaha Barcelona iyo Inter Milan saxiixa Aubameyang, ayuu ku jawaabay Mikel Arteta:
“Baaxada kooxdeena waa mid u weyn sida magacyadan oo kale, waxa ugu muhiimsan waa kooxda, iyo waxa aan ku guuleysan karno mustaqbalka”.
“Waa inaan xaqiijinaa in ciyaartoydeena ay rumeeyaan mashruuceena”.
Waxaa xusid mudan in Pierre-Emerick Aubameyang uu kordhiyay qandaraaska uu kula joogo kooxda reer London ee Arsenal, wuxuuna saxiixay heshiis gaaraya ilaa iyo June 2023, inkasta oo ay kooxaha Inter Milan iyo Barcelona xiiseynayeen inay la saxiixdaan.
Gool FM.
