Dhoobley(Idaacadda Sanguuni)-Wakiilka reer Talyaani Alessandro Moggi ayaa qiray in Napoli ay tahay inay isha ku hayso bedelka xiddiga Nigeria Victor Osimhen haddii ay dhacdo inuu u wareego Manchester United ama Real Madrid.
Ciyaaryahanka heerka caalami ee dalka Nigeria ayaa horey loola xiriirinayay inuu u dhaqaaqayo garoonka Old Trafford ama Santiago Bernabeu suuqa xagaaga,
Victor Osimhen ayaa ah mid ka mid ah xiddigaha da’ayarta ee ugu wanaagsan kubadda cagta Yurub, inkastoo dhaawaciisa uu batay, wuxuu dhaliyay 11 gool, 22 kulan uu u saftay kooxdiisa Napoli tartamada oo dhan xilli ciyaareedkan.
Wakiilka reer Talyaani Alessandro Moggi ayaa wareysi uu ku bixiyay Radio Marti ayaa wuxuu yiri:
“Waxaan u maleynayaa in qaar badan oo ka mid ah kooxaha waa weyn ee Yurub ay dhab ahaantii xiiseynayaan saxiixa Osimhen, wuxuu horey u cadeeyay tayadiisa.”
“Waa la arki doonaa haddii Napoli ay iibin doonto Osimhen.”
Sida laga soo xigtay Ray Sport, madaxweynaha kooxda Napoli ee Aurelio De Laurentiis ayaa laga yaabaa inuu ku iibiyo Victor Osimhen qiimo ku dhow 100 million euros.
