Dhoobley(Idaacadda Sanguuni)-Halyeeygii hore ee Jarmalka iyo Liverpool, Didi Hamann, ayaa sheegay in kaliya laba koox ay awood u leeyihiin inay xilli-ciyaareedkan tartan dhab ah la galaan Liverpool oo difaacaneysa horyaalka Premier League.
Liverpool ayaa xilli-ciyaareedkii hore ku qaaday horyaalka 10 dhibcood oo nadiif ah, waxayna xagaagan ku xoojisay kooxda tababare Arne Slot ciyaartooy ay ka mid yihiin Alexander Isak, Florian Wirtz iyo Jeremie Frimpong, taas oo ka dhigtay koox si weyn loogu saadaalinayo inay mar kale guuleysato.
Inkasta oo aysan weli soo bandhigin qaab ciyaareedkoodii ugu fiicnaa, Liverpool ayaa ah kooxda keliya ee leh 100% rikoodh kadib saddex kulan oo hore.
Hamann ayaa ku tilmaamay Arsenal inay tahay hanjabaadda ugu weyn ee Liverpool, halka Chelsea uu sheegay inay tahay kooxda kale ee leh awoodda ay kula tartami karto.
Arsenal ayaa labo guul gaartay bilowga xilli-ciyaareedka, ka hor inta aysan 1-0 kaga badinin Liverpool ciyaar xiiso leh oo ka horreysay fasaxa caalamiga. Sidoo kale, Gunners ayaa suuqa kasoo qaadatay saxiixyo muhiim ah oo ay ka mid yihiin Viktor Gyökeres, Martin Zubimendi iyo Noni Madueke.
