Dhoobleey(Idaacadda Sanguuni)-Weeraryahanka kooxda Manchester United ee Cristiano Ronaldo ayaa xalay ku laabtay magaalaada Manchester isaga oo halkaas u tagay si uu wadahadalo uga galo mustaqbalkiisa xilli uu bixitaan doonayo.
Ronaldo ayaa horraantii bishan July ku wargeliyay maamulka Man United war gilgilay oo ah inuu bixitaan doonayo iyadoo la sheegay inuusan kalsooni ku qabin awooda ay kooxdu ku tartamayso iyo waliba nooca saxeexyada ay suuqa ka samaynayso midna.
Ronaldo ayaa lala xidhiidhiyay kooxo badan oo laga magacaabi karo Bayern Munich, Chelsea iyo Real Madrid waxaana ugu dambaysay oo haatan la hadal hayaa Atletico Madrid.
Wali ma cada haddii uu 37 sano jirkaasi si rasmi ah uga hayaami doono Old Trafford xagaagan maadaama ay kooxdu diidan tahay inay ogolaato inuu ka hayaamo.
Ronaldo ayaa doonaya inuusan ka maqnaan tartanka uu goolasha iyo caawintaba horkacayo ee Champions League oo aysan Man United ka qayb galayn xilli ciyaareedka dambe.
