Dhoobley(Idaacadda Sanguuni)-Kooxda kubadda cagta Real Madrid ayaa laba weerar oo is-daba socda ku qaadaysa Chelsea oo ay ku dagaallami doonaan wareegga siddeedda Champions League bisha dambe ee Arpil ee foodda inagu soo haysa. Los Blancos ayaa ka sokow natiijada iyo qaab ciyaareedka kulanka Blues, waxay samayn doonaan isku-day weyn oo ay xiddigo kaga soo qaadanayaan Stamford Bridge.
Dani Carvajal oo si weyn ay ciyaartiisu hoos ugu dhacday, isla markaana Salaasadii kaydka loo diray ciyaartii xulkiisa Spain ay guul-darradu kasoo gaadhay ee Glasgow oo laga doorbiday Pedro Porro.
Waqtigii koobnaa ee uu ku jiray garoonka, waxa Dani Carvajal si fudud dhawr jeer u dhaafay Kieran Tierney, waxaana uu qaab ciyaareedkiisu muujiyey in aanu u qalmaynin inuu sii ahaado dookha koowaad ee difaaca midig ee Real Madrid, isaga oo 15 jeer lumiyey kubadda.
Sida uu qoray wargeyska Diario AS, Real Madrid ayaa hadda quus ka taagan tahay Dani Carvajal, waxaanay doonaysaa beddelkiisa oo ay u xulatay difaaca midig ee Chelsea ee Reece James.
Dhinaca kale, Real Madrid ayaa doonaaysa xiddiga reer Germany ee Kai Havertz oo ay u doorteen inuu noqdo beddelka Karim Benzema, inkasta oo ay jiraan ciyaartooyo kale oo ay kala xulanayaan.
