Dhoobley(Idaacadda Sanguuni)-Kooxaha kubadda cagta Liverpool iyo Real Madrid ayaa si weyn u baacsanaya xiddiga khadka dhexe uga ciyaara naadiga Borussia Dortmund ee Jude Bellingham kaasoo weli qaab ciyaareed heer sare ah sameynaya xilli ciyaareedkan.
18-sano jirkan ayaa 27 kulan u saftay naadiga Dortmund xilli ciyaareedkan isagoo u dhaliyay saddex gool sidoo kalena caawiyay toddobo kale, waxaana uu jiitay dareenka kooxo waaweyn oo ka dhisan qaaradda Yurub, waxaana ku jira Liverpool iyo Real Madrid.
Macallinka kooxda Ingiriiska ka dhisan ee Jurgen Klopp ayaa lasoo warinayaa inuu aad u xiiseynayo Bellingham isagoo aaminsan inuu kubbad sameeyahan da’da yar ka mid noqon doono kubbad sameeyeyaasha ugu wanaagsan kubadda cagta qaaradda Yurub sanadaha soo aaddan.
Halka dhinaca kale, macallinka Los Blancos ee Carlo Ancelotti uu isna doonayo inuu xiddigan kusoo daro khadkiisa dhexe maadaama uusan hubanti ahayn mustaqbalka Toni Kroos iyo Luka Modric kuwaasoo la filayo inay Madrid isaga fasixi doonto da’dooda oo sarreysa awgeed, sidoo kale maxadweynaha kooxda reer Spain ee Florentino Perez ayaa xiiseynaya saxiixa laacibka reer England.
Si kastaba ha ahaatee, wargeyska The Bild ee kasoo baxa dalka Jarmalka ayaa sheegaya inay kooxda ka ciyaarta horyaalka Bundesliga xiddigan ku iibineyso keliya lacag gaareysa 100 milyan oo euro.
Gool FM.
