Dhoobley(Idaacadda Sanguuni)-Waxaa caawa la ciyaari doonaa labo ka mid ah kulammada bug-baxa ee loogu soo baxayo ka qayb-galka Koobka Adduunka ee sanadkan ka dhacaya dalka Qatar.
Kulanka u dhexeeya xulalka qaranka Portugal iyo North Macedonia ayaa indhaha lagu hayaa maadaama xulka martida ah aanan la dhayalsan karin kaddib casharkii ay u dhigeen xulka qaranka Taliyaaniga oo ay dalkiisa kusoo reebeen.
Si kastaba ha ahaatee, caawa Cristiano Ronaldo iyo xulkiisa ayaa rajeynaya inay quusiyaan North Macedonia si ay isaga xaadiriyaan ka qayb-galka Koobka Adduunka 2022.
Dhinaca kale, xulka Poland oo kasoo gudbay xulka Ruushka oo tartanka laga saaray ayaa la ciyaaraya xulka Sweden oo soo khaarijiyay xulka Czech Republic.
Labada guuleyste ee kulammada caawa ayaa u gudbi doona ka qayb galka Koobka Adduunka ee sanadkan daba-yaaqadiisa lagu qaban doono dalka Qatar, waxaana xulalka Yurub ka dhimman kulan uu xulka Wales la qaadan doono midkood xulalka Scotland iyo Ukriane kuwaasoo ciyaartooda loo baajiyay duruufaha dalka Ukriane ka jira awgood.
Si kastaba ha ahaatee, kulammada caawa ayaa la baasan doonaa 9:45 habeennimo xilliga Geeska Afrika.
