Dhobley(Idaacadda Sanguuni)-Real Madrid ayaa si sahlan garoonkeeda Santiago Bernabéu saddexda dhibcood kaga qaadatay kooxda Valencia, kaddib markiii ay kaga adkaatay 4-1, ciyaar qeyb ka ahayd kulammada toddobaadkan ee horyaalka La Liga dalka Spain.
Qeybta hore ee ciyaarta ayaa lagu kala nastay 1-0 ay ku hoggaamineysay kooxda martida loo ahaa ee Real Madrid.
Daqiiqadii 43-aad Real Madrid ayaa hoggaanka u qabatay ciyaarta kaddib markii rigoore loo dhigay uu gool u badelay weeraryahankooda reer France ee Karim Benzema, dheesha sidaas ku noqotay 1-0.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
52 daqiiqo marka ay dheesha mareysay Real Madrid ayaa dhalisay gool labaad waxaana 2-0 ka dhigay ciyaarta da’ayarkooda reer Brazil ee Vinícius Júnior.
Mar kale daqiiqadii 61-aad Vinícius Júnior ayaa wuxuu ciyaarta ka dhigay 3-0 ay ku hoggaamineysay kooxda Real Madrid.
77 daqiiqo maka ay dheesha mareysay kooxda Valencia ayaa dhalisay gool waxaana 3-1 ka digay ciyaarta laacibkooda Gonçalo Guedes.
Laakiin daqiiqadii 88-aad Karim Benzema oo caawin ka helay saxiibkiis Ferland Mendy ayaa wuxuu dheesha ka dhigay 4-1 ay ku hoggaamineysay Los Blancos.
Ugu dambeyntii ciyaarta ayaa ku dhammaatay 4-1 ay kaga adkaatay Real Madrid, kooxda Valencia oo marti ugu ahayd garoonka Santiago Bernabéu, Los Blancos ayaa ku hoggaamineysa kala sareynta horyaaalka 49 dhibcood, waxayna 8 dibcood ka sareysa kooxda ku soo xigta ee Sevilla.
