(Dhoobley(Idaacadda Sanguuni). Madaxweynaha Barcelona ee Joan Laporta ayaa xaqiijiyay in xiddiga reer Antoine Griezmann inuusan ahayn ciyaaryahan ku haboon naadiga Blaugrana, kaddib markii kooxda ay amaah ku siisay Atletico Madrid.
Taageerayaasha Barcelona ayaa rajo weyn ka qabay Griezmann kaddib markii ay kooxda ku soo iibsatay 108 million pounds sanadkii 2019, laakiin wuxuu ku guuldarreystay inuu isku muujiyo Blaugrana.
Haddaba Madaxweynaha kooxda Barcelona ee Joan Laporta ayaa wareysi uu dhawaan bixiyay wuxuu ku sheegay in heshiiskii Antoine Griezmann uusan noqon mid guuleystay ugu dambeyntii.
Isaga oo dhinaca kale carabka ku adkeeyay in dabeecadda iyo xirfadda ciyaaryahanka ayaan shaki la gelin karin, wuxuuna ku ammaanay inuu yahay ciyaaryahan weyn.
Joan Laporta ayaa wareysiga uu bixiyay waxaa hadaladiisa ka mid ahaa:
“Waxaan u malaynayaa in qof walba uu wax badan ka filayay isaga, sababtoo ah waxa walba ayuu soo bandhigay, mana laga shaki qabin, waan ognahay nooca ciyaaryahan ee uu ahaa, waa ciyaaryahan weyn.”
“Dhanka kubadda cagta, ma aheyn laacibkii aan u baahnayn, goolal ayuu dhaliyey, waxaan u malaynayaa in goolkii uu ka dhaliyey Copa del Rey ee aan ku guuleysanay sanadkii hore inuu ahaa mid aad muhiim u ah, wuxuu samayn karay wax badan, laakiin wuxuu soo maray xaallado adag.”
