Kooxaha Chelsea iyo Tottenham Hotspur ayaa barbardhac 0-0 ku kala baxay, kaddib kulan aad u xiiso badan ay ku wada ciyaareen garoonka Stamford Bridge, kaasoo qeyb ka ahaa horyaalka Premier League ee dalka England.
Frank Lampard ayaa ciyaarta kaddib wareysi uu bixiyay wuxuu ku sheegay:
“Waxaan helnay fursado aan goolal ku dhalin gaarnay, balse iyagu wax halis ah ma aysan galinin goolkeena, waxaa kaliya naga maqnaa ayaa ahaa inaan saxno taabashada ugu dambeysay.”
“Waan ognahay halista Harry Kane, aad ayaana ugu faraxsanahay inaan joojinay oo aan kahor istaagnay inuu gool dhaliyo, waan ognahay inuu si fiican ula ciyaarayo Son.”
Si kastaba ha ahaatee, kooxda kubadda cagta ee Chelsea ayaa fadhisa booska saddexaad ee dhanka miiska kala sareynta Premier League, kaddib markii ay uruursadeen 19 dhibcood, halka Tottenham ay horyaalka ku hoggaamineyso 21 dhibcood.
Chelsea ayaa kulankeeda soo aadan ee horyaalka Premier League waxay kula ciyaari doontaa Leeds United Sabtida soo socota, halka Tottenham ay ku wajihi doonto Arsenal axada kulan kale oo London Derby ah.
