Waxaa lagula taliyey Man City inay haddaba sii calaamadaystaan tababaraha ay ku bedeli lahaayeen Pep Guardiola marka uu heshiiskiisa ka dhammaado ee uu isaga tago.
Qaab aan wanaagsanayn ayay Man City ku bilaabatay kal ciyaareedkan, waxaana shan gool ku xaaqday kooxda Leicester City, halka ay barbaro la galeen kulankii xigay naadiga Leeds United.
Weeraryahankii hore ee reer England, Darren Bent ayaa ku wargeliyey Kooxda Manchester City inay u dhaqaaqdo hoggaamiyaha haatan ee Kooxda Leeds United ee Marcelo Bielsa oo ay keenaan garoonka Etihad marka uu ka tago Guardiola.
15-sanadood kaddib macallin Marcelo Bielsa ayaa kooxda Leeds United ku soo celiyey horyaalka Premier League, waxaana kulamaddii illaa iyo hadda uu kooxda ku hoggaamiyey horyaalka Premier League oo ahaa afar kulan ay guuleysteen labo ka mid ah, halka barbaro ay la galeen Man City isla markaana ay rigoore goor dambe ah kaga adkaatay Kooxda Liverpool oo ay ku kala tageen 4-3.
Darren Bent ayaa Man City kula taliyey inay ka shaqeeyaan sidii aan Bielsa looga hor qaadan lahayn oo ay ka dhigaan beddelka rasmiga ah ee Tababare Pep Guardiola oo heshiiskiisu ku egyahay dhammaadka xili ciyaareedkan.
Isagoo arrintan ka hadlayey Darren Bent waxa uu yiri: “Waxa ay ku xiran tahay waxa ku dhacaya macallin Pep iyo kooxdiisa Man City & Sidoo kale qaar ka mid ah tababareyaasha sare, waxa ayse ila tahay in Bielsa uu keliya saxiixay heshiis hal sano ah.
“Waxaa raadin doona kooxo badan marka uu dhammaado xilli ciyaareedka, iyadoo aan loo eegin sida ay tahay Leeds United, sidaas awgeed waa inay City doonato Bielsa.”
