Dhoobley(Idaacadda Sanguuni)-Daafaca dhexe ee kooxda Lille Leny Yoro ayaa lagu soo waramayaa inuu ku faraxsanaan lahaa inuu burburo qandaraaskiisa Stade Pierre-Mauroy si uu dhibaato la’aan ugu biiro Real Madrid xagaaga soo aadan.
18-sano-jirku waa mid ka mid ah daafacyada dhexe ee aadka loogu doonis badan yahay suuqa iyadoo ay ugu wacan tahay bandhigiisii quruxda badna ee horyaalka Faransiiska.
Yoro ayaa dhaliyay seddex gool 44 kulan oo uu u saftay Lille xilli ciyaareedkii hore intii uu hogaaminayay Paulo Fonseca, isagoo ka caawiyay Lille inay ku dhameystaan afarta sare ee horyaalka Ligue 1.
Da’yarka ayaa sidoo kale 23-jirada France u saftay kulankiisii ugu horreeyay, inkastoo uusan dalkiisa u matali doonin ciyaaraha Olombikada Paris ee 2024, maadaama Lille ay diiday inay u fasaxdo tartanka.
Si kastaba ha ahaatee, kooxda Lille ma awoodi doonto wax kale oo aan ka ahayn inay free ku fasaxdo kooxda xagaagan ama kan soo socda, maadaama uu haatan galay 12-kii bilood ee ugu dambeeyay qandaraaskiisa Stade Pierre-Mauroy, islamarkaana uusan dooneyn inuu u kordhiyo.
Inkasta oo ay xiisaynayeen kooxaha Liverpool, Manchester City iyo Paris Saint-Germain, Yoro ayaa la rumaysan yahay in uu qalbigiisa ku sii jeedo ku biirista Real Madrid, kuwaas oo sidoo kale jeclaan lahaa in uu ka mid noqdo safkooda.
Yoro ayaa xitaa diyaar u ah inuu sii joogo Lille sanad kale, oo uu qandaraaskiisa dhaco oo uu si xor ah ugu biiro Real haddii labada kooxood ay ku heshiin waayan qiimahiisa xagaagan.
Lille waxa ay dooneysaa ku dhawaad €60 milyan si ay u fasaxdo xiddiga dhashay 2005-tii, laakiin Real Madrid ayaa kaliya diyaar u ah inay ku iibisato 40 Milyan oo Euro.
Dhammaan kooxaha Real Madrid, Lille iyo Yoro qudhiisa ayaan mugdi ku jirin rabitaanka xiddiga reer France ee ah in uu rabo u ciyaarista kooxda 15-ka jeer ku guulaysatay horyaalka Yurub, waxana uu mawqifkiisa noqon karaa in uu culayska ku saaro kooxdiisa haatan in uu markan heshiis la gaadho Los Blancos.
Si kastaba ha ahaatee, ma jiri doonto dammaanad qaad ah in Yoro uu heshiiska shaqsiga ah kula heshiin doono kooxaha kale ee doonaya, iyadoo la tixgelinayo rabitaankiisa kulul ee ah inuu u ciyaaro kooxda Carlo Ancelotti midkood 2024-25 ama 2025-26.
Haddii Yoro uu ka dhici laha qandaraaskiisa Lille oo uu ugu dhaqaaqi lahaa Bernabeu lacag la’aan, 18-sano jirkaan wuxuu noqon laha sidii Kylian Mbappe oo kale kaasoo sidoo kale si bilaash ah uga tagay Paris Saint-Germain uguna biiray Real.
Mbappe ayaa hubaal ah inuu noqon doono saxiixa kaliya ee Los Blancos xagaagan, inkastoo ay jiraan hadal heyn ku aadan inay lasoo wareegayan daafaceda Alphonso Davies, kaasoo sida Yoro sidoo kale ku jira 12-kii bilood ee ugu dambeeyay ee heshiiskiisa.
Daafaca bidix ee reer Canada ayaa sidoo kale qarka u saaran inuu noqdo wakiilka xorta ah 2025 ka dib markii ay burbureen wadahadaladii qandaraaska ee Bayern.
