Dhoobleey(Idaacadda Sanguuni)-Xulka Morocco ayaa u gudbay wareega xiga ee afar dhammaadka koobka adduunka kaddib markii ay kaga adkaadeen Portugal 1-0, kulankii wareega siddeed dhammaadka, ciyaar ka dhacday garoonka Al Thumama
Qeybta hore ee ciyaarta ayaa lagu kala nastay 1-0 uu ku hoggaaminayay xulka qaranka Morocco.
Daqiiqadii 42-aad xulka qaranka Morocco ayaa hoggaanka u qabtay ciyaarta kaddib markii uu 1-0 ka dhigay laacibkooda En-Nesyri, waxaana ka caawiyay saaxiibkiis Yahia Attiyat Allah.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
Balse ugu dambeyntii ciyaarta ayaa ku dhammaatay 1-0 uu xulka qaranka Morocco kaga adkaatay dhigooda Portugal, waxayna u gudbeen wareega xiga ee afar dhammaadka koobka adduunka 2022 ee ka socda dalka Qatar.
