Labo kooxood oo Ingiriiska ka socda ayaa isugu soo haray final-ka tartanka UEFA Champions League, waxaana Magaalada Istanbul ee dalka Turkiga ku wada ciyaari doona Kooxaha Chelsea iyo Manchester City.
Kooxda Man City ayaa 2-0 kaga adkaatay Paris Saint-Germain habeen hore waxaana cel-celis ahaan ay kaga soo gudbeen 4-1, halka Chelsea ay xalay 2-0 ku garaacday Real Madrid, iyadoo wadar ahaan ku reebtay labada lugba 3-1.
Haddaba afarta laacib ee ugu bandhigga fiicnaa todobaadkan Champions League ayaa waxaa ku tartami doona Daafaca Man City ee Ruben Dias oo ku guuleystay xiddiga garoonka kulankii habeen hore iyo Riyad Mahrez oo labo gool ugu shubay PSG.
Dhinaca kale Kooxda Chelsea oo reebtay Real Madrid waxaa ugu jira N’Golo Kante oo markale khadka dhexe ka qabsaday xiddigaha Los Blancos, isla markaana xiddigii ugu fiicnaa qaatay kulankii xalay iyo sidoo kale Kai Havertz oo wacdarro dhigay kulankii ka dhacay garoonka Stamford Bridge.
