(Lisbon) 24 Agoosto 2020. Xiddiga reer Brazil ee Philippe Coutinho ayaa sheegay inuu doonayo inuu ku laabto kooxda Barcelona inta lagu guda jiro xilli ciyaareedka soo socda.
Philippe Coutinho ayaa carabka ku adkeeyay inuu doonayo inuu guul la gaaro kooxda reer Catalonia ee Barcelona, sida uu haddaba ku sameeyay naadiga reer Germany ee Bayern Munich.
Philippe Coutinho ayaa kula guuleystay koobka Champions League kooxda Bayern Munich, kaddib markii ay kaga adkaadeen Paris Saint-Germain 0-1 oo uu dhaliyay xiddiga reer France ee Kingsley Coman daqiiqadii 59-aad ee qeybta labaad ciyaarta.
Coutinho ayaa kaddib marka ay kooxda Bayern Munich ku guuleysatay koobka UEFA Champions League u sheegay warbaahinta:
“Kama fikirin mustaqbalkeyga maalmihii la soo dhaafay, sababtoo ah waxaan diirada saaray finalka”.
“Haatan waxaan ku laaban doonaa Barcelona, runtiina waxaan doonayaa inaan kusoo laabto oo aan guuleysto, waan arki doonaa waxa dhici doona”.
Sida laga soo xigtay wargeyska “Mundo Deportivo” ee dalka Spain Ronald Koeman wuxuu weydiistay maamulka Barcelona inay ku sii hayaan Coutinho kooxda xilli ciyaareedka soo socda, sidaas darteed xiddiga reer Brazil ayaa wixii xilligan ka dambeeya ku laaban doono naadiga reer Catalonia, isagoo la kulmi doono tababaraha reer Holland si arrinta loo xaliyo.
Philippe Coutinho ayaa u soo ciyaaray hal xilli iyo bar kooxda Barcelona, laakiin wuxuu ku guuldareystay inuu isku muujiyo macalinkii hore ee Ernesto Valverde, sidaas darteed Barca waxay go’aansatay inay amaah hal xilli ciyaareedka ah ku siiso Bayern Munich, iyadoo heshiiska qeyb looga dhigay inay ku iibsan karto 120 milyan euro, hadii ay la dhacdo qaab ciyaareedkiisa.
Gool FM.
