Dhoobley(Idaacadda Sanguuni)-Xiddiga reer Argentina ee Lionel Messi ayaa dib ugu laabanaya kooxdiisii hore ee Barcelona oo uu heshiis xor ah u saxeexi doono sannadka dambe, markaas oo uu ku egyahay qandaraaskii labada sannadood ahaa ee uu u saxeexay Paris Saint-Germain.
Tababaraha Barcelona ee Xavi Hernandez ayaa la sheegay inuu codsi u diray Lionel Messi oo uu ka dalbaday inuu dib ugu soo laabto Camp Nou, kaddib markii ay kooxdiisu 1-0 kaga badisay Real Madrid kulan saaxiibtinimo oo ka dhacay waddanka Maraykanka.
Xavi ayaa rumaysan in Messi uu tiir-dhexaad u noqon doono guulo ay kooxdu gaadho sannadaha soo socda, isla markaana uu ka caawin doono inay maareeyaan dhibaatooyinka dhaqaale xumo ee ay ku jiraan.
Lionel Messi iyo Xavi Hernandez oo leh xidhiidh saaxiibtinimo oo dhow, isla maarkaana iska soo garab ciyaaray muddo ku dhow toban sannadood oo ay Barcelona wada joogeen, ayaa waxay dib u midoobi doonaan sannadka dambe ee 2023 sida ay warbaahinta Spain sheegtay.
