Dhoobley(Idaacadda Sanguuni)-Kooxda kubadda cagta Real Madrid waxa ay Axaddii ku guuleysatay horyaalkeedii 36aad ee LaLiga ah, balse ma aanay awoodin inay u dabbaal-degaan oo la guddoonsiiyo koobka, sababtoo ah waxa ay guushoodu ku xidhnayd natiijada ciyaartii Girona iyo Barcelona oo saacad ka dambaysay.
Los Blancos ayaa ay ciyaartoydoodu guryahooda ka daawadeen kulankii Barcelona iyo Girona oo ka dhacayay meel magaalada Madrid u jirta 431 kiiloo mitir oo ahayd garoonka Girona ee ku yaalla duleedka magaalada Barcelona.
Carlo Ancelotti ayaa hore usii sheegay in ciyaartoyda iyo taageereyaashuba aanay dabbaal-degi doonin oo ay sugi doonaan illaa usbuuca dambe sababtoo ah ciyaarta muhiimka ah ee lugta labaad ee semi-finalka Champions League oo ay sugayaan inta ay ciyaarayaan si aanu dabbaal-deggu uga mashquulinin kulankaas.
Maalinta Axadda ee toddobaadka soo socda, ayaa Real Madrid ay gacanta ku dhigi doontaa horyaalka marka ay la ciyaaraan kooxda Granada ee heeerka labaad u dhaadhacaysa, waxaana isla fiidnimada ay usoo shiraacan doonaan barxadda magaalada Madrid oo ay taageereyaashoodu iskugu soo bixi doonaan.
Nacho Fernandez ayaa koobka gacanta loo gelin doonaa isaga oo ah kabtanka kooxda, waxaana badhtamaha magaalada ay usii dhaafi doonaan garoonkooda Santiago Bernabeu oo qayb dusha sare ah looga sameeyey goob ay kooxdu ku dabbaal-dego marka ay koobabka ku guuleysato.
Sidoo kael, Arbacada haddii ay Real Madrid ka badiso Bayern Munich oo ay usoo gudubto finalka Champions League, waxa ay sii bilaabi doonaan dabbaal-degga guushoodan.
