Dhoobley(Idaacadda Sanguuni)-Tababaraha Manchester United ee Erik Ten Hag ayaa u muuqda mid sii doortay xiddigaha uu u dhaqaaqayo saxeexyadooda midkood bedelka Cristiano Ronaldo.
Ronaldo ayaa heshiiska uu ku joogo Old Trafford yahay mid dhacaya dhammaadka xilli ciyaareedkan waxaana intaas dheer inuu kooxda bixitaan ka dalbaday suuqii xagaaga.
Weeraryahanka koowaad ee ay Manchester isha ugu hayso bedelka Ronaldo ayaa ah da’yarka dhaliyaha kooxda RB Salzburg ee Benjamin Sesko oo ay saxeexiisa isku dayi doonaan suuqa January amaba xagaaga dambe.
Mid kamida waxyaabaha ku qasbaya Red Devils saxeexa dhaliye cusub ayaa ah joogtayn la’aanta Marcus Rashford iyo Anthony Martial.
Xagaagii ayay ahayd markii Red Devils isku dayeen saxeexa Marko Arnautovic iyadoo uusan dalabkaasi noqon mid ay ku qanceen jamaahiirta kooxdu, haatan qorshahooda ayaa ah saxeexa weeraryahan da’yar ah oo mustaqbalka fog ay ugu tashanayaan.
Arrinta caqabada ku ah heshiis ay Sesko ku damcaan ayaa ah inuu da’yarkaasi durba heshiis hordhac ah lasii gaadhay kooxda ay RB Salzburg mataanaha yihiin ee RB Leipzig oo lagu wado inuu xagaaga dambe ku biiro.
Weeraryahanka kale ee ay Manchester doonayso ayaa ah Dusan Vlahovic oo xilli ciyaareedkiisii koowaad ee dhammaystiran ku qaadanaya Juventus oo uu January 2022 kusoo biiray.
