Dhoobley(Idaacadda Sanguuni)-Arsenal ayay warar cusubi sheegayaan inay heshiiska shaqsiga ah la gaadhay mid kamida xiddigaha laf-dhabarta u ah haatan kooxda Real Madrid dhawr sano kahor balse ay ka gaabisay inay dhammaystirto heshiiskaas.
Xiddigaas ayaa ah 24 sano jirka khadka dhexe ee ree Uruguay ee Federico Valverde oo haatan aad muhiim uga ah xulashada tababare Carlo Ancelotti.
Si kastaba, arrimaha Valverde ayaa noqon karayay kuwo gabi ahaanba sidaas ka duwan maadaama tababarihii hore ee Arsenal ee Arsene Wenger saxeexiisa doonayay sida lagu sheegay wargeyska AS.
Heshiiska ayaa ahaa mid ay dhawdahay in la dhammaystiro kaddib markii Fede u safray magaalada London bishii December ee sanadkii 2014 si uu halkaas tababar ugula qaato kooxda koowaad ee Gunners.
Arsenal ayaa go’aansatay inay hakad geliso heshiiskaas taas oo haatan ah halka ay qaladka weyn ka galeen maadaama intaas kaddib Valverde uu wacdarro kasoo dhigay tartankii South America ee xiddigaha da’doodu 17 sano jirada ka yar tahay oo ka dhacay Paraguay.
Intii uu tartankaasi socday ayuu Federico toddoba gool kasoo dhaliyay taas oo keentay in Arsenal dalab degdeg ah oo 3 Milyan oo euro ah miiska u saarto kooxda uu ka tirsanaa.
Nasiib darro heshiiska ayaa markaas looga horreeyay Gunners waxaana xilli horeba 5 Milyan oo euro kula heshiiyay Real Madrid oo uu hadda muhiim u yahay.
