Dhoobleey(Idaacadda Sanguuni)-Liverpool ayay wararku sheegayaan inay suuqii xagaagan ee xidhmay doonaysay mid kamida xiddigaha badan ee ay Chelsea kala wareegtay suuqa.
Sida uu sheegayo wargeyska Calciomercato, kooxda Jurgen Klopp ayaa isku dayday saxeexa khadkii dhexe ee Juventus ee Denis Zakaria balse ciyaaryahanka ayaa bedelkeeda ka degay Chelsea.
Kaddib markii ay Zakaria weyday Liverpool ayaa bedelkiisa ka heshay isla Juventus waxaana ay kasoo qaateen Arthur Melo oo amaah ugu yimid.
Liverpool ayaa awoodi wayday inay Zakaria iyo kooxdiisa Juventus midkoodna la heshiiso waxaana awooday Chelsea oo 2.5 Milyan pound ka bixisay sanadka uu amaahda kula joogayo isla markaana haddiiba ay hadhaw u baahato 24.1 Milyan pound rasmi kaga dhigi karta heshiiskiisa.
Dhinaca heshiiska Arthur Liverpool ayaa sanadka amaahda ah ka bixisay 3.87 Milyan pound halka ay hadhaw rasmi kaga dhigi karto 32.4 Milyan pound.
Arthur ayaa keydka soo fadhiistay isla markaana bedel aan la isticmaalin ka ahaa kulankii Merseyside Derby ee ay barbardhaca goolal la’aanta ah lasoo galeen Everton Sabtidii.
26 sano jirkaas ayaa rajaynaya inuu ku lug yeesho kulanka ugu horreeya Champions League ee Reds ay booqanayaan Napoli maalmo kaddib.
