Dhoobley(Idaacadda Sanguuni)-Wasiirka Caafimaadka iyo Daryeelka Bulshada XFS Dr. Cali Xaaji Aadam oo ku sugan magaalada Tunis ee dalka Tunisia, ayaa maanta kulan miro-dhal ah la yeeshay dhiggiisa Algeria, Wasiirka Caafimaadka, Abdelhak Saihi, sida lagu sheegay war ka soo baxay xafiiska Wasaaradda.
Kulankan oo qeyb ka ah shirarka heer caalami ee lagu xoojinayo iskaashiga dalalka ku bahoobay Midowga Afrika, ayaa diiradda lagu saaray sidii loo xoojin lahaa xiriirka dhinaca caafimaadka ee Soomaaliya iyo Algeria.
Sidoo kale, Wasiirradu waxay isku afgarteen in la abuuro fursado tababar iyo aqoon-kororsi oo loo fidiyo xirfadlayaasha caafimaadka ee Soomaaliyeed, Algeria ayaa ballan qaaday inay la wadaagi doonto Soomaaliya khibradaha iyo aqoonta sare ee ay u leedahay horumarinta adeegyada caafimaadka.
Wasiirrada waxay isku raaceen in khibradaha la wadaago si wax looga qabto cudurrada faafa, gaar ahaan kuwa ka dhasha xaaladaha deg degga ah iyo masiibooyinka dabiiciga ah.
Kulanka, Wasiirka Caafimaadka Soomaaliya, Dr. Cali Xaaji Aadam, ayaa ku ammaanay dowladda Algeria kaalinta ay ka qaadanayso horumarinta iskaashiga caalamiga ah, Waxaa uu tilmaamay in iskaashigan uu door weyn ka qaadan doono horumarinta adeegyada caafimaadka ee Soomaaliya.
