Dhoobley(Idaacadda Sanguuni)-Real Madrid ayaa qaadatay tababarkii ugu dambeeyay kahor kulanka saaxiibtinimo ee ay Juventus la ciyaarayso maanta, tababarkaas ayaa ahaa mid ay kooxdu ku dhantahay taas oo Carlo Ancelotti u ogolaanaysa inuu xulashada ugu fiican sameeyo.
Ancelotti ayaa ka shaqaynaya shaxdii uu 10-ka bisha August ku ciyaari lahaa Finalka UEFA Super Cup oo ay kaga hortagayaan kooxda Eintracht Frankfurt.
Shaxdaas ayaa la filayaa inay noqon doonto: Courtois, Carvajal, Militao, Alaba, Mendy, Modric, Kroos, Casemiro, Valverde, Vinicius iyo Benzema oo marka si kale loo dhigo ah shaxdii ay ku qaadeen Final-kii Champions League.
Taas ayaa ka dhigan in Ancelotti uu Final-ka Super Cup keydka dhigi karo labada saxeex ee cusub ee Antonio Rudiger iyo Aurelien Tchouameni.
Ancelotti ayaa kulankii ugu dambeeyay ee ay barbardhaca 2-2 ah lasoo galeen kooxda America ee Mexico ka socotay qishay inuu Frankfurt kaga hortagayo shax u badan midii xilli ciyaareedkii hore.
“11-kaasi waxay in badan noqonayaan sidii sanadkii hore sababtoo ah waa koob lagu yimaado ku guuleysiga Champions League taasna waa in lagu xisaabtamo” ayuu yidhi tababaraha Talyaaniga ahi.
