Dhoobley(Idaacadda Sanguuni)-Sergio Aguero ayaa ku guuleystay 19 kun doolar oo sharad ah ka dib markii uu saadaaliyay in ciyaartii xalay ee Santiago Bernabeu la iska dhalinayo goolal badan.
Xiddiga reer Argentina ayaa sharad 10 kun doolar ku galay in ciyaarta Bernabeu la iska dhalinayo wax ka badan labo gool, sharadkiisa kuma jirin kooxda goolasha dhalineysa, iyadoo sharuuda aheyd inuu lacagta qaadanayo haddii seddex gool la iska dhaliyo.
Aguero ayaana lacagta ku guuleystay 15 daqiiqo markii ay socotay ciyaarta markaasoo ay ciyaarta mareysay 2-1 oo ay Real Madrid hogaanka ku heysay.
“Ciyaar tan maanta oo kale ah waxay u qalantaa goolal badan” ayuu Aguero ku soo qoray baraha bulshada.
Saadaashiisa ayaana rumowday isagoo 10kii kun doolar ee uu sharadka ku galay ku helay 18,900 doolar.
Bernando Silva ayaa bilowgii ciyaarta hogaanka u dhiibay Man City ka hor inta aysan Real Madrid goolka barbaraha ku helin goolka uu iska dhaliyay Ruben Dias.
Vinicius Jr ayaa ka dib hogaanka u dhiibay Real Madrid daqiiqadii 14aad ee ciyaarta, iyadoo sidaas lagu kala nastay qeybtii hore.
Qeybtii labaad Man City ayaa ciyaarta ku soo laabatay iyadoo Phil Foden uu ciyaarta ka dhigay barbaro 2-2 ah, ka hor inta uusan daafaca Gvardiol hogaanka u dhiibin City oo uusan ciyaarta ka dhigin 3-2.
Los Blancos ayaa markeedii barbareysay City markii uu shabaqa u soo taabtay Federico Valverde taasoo ka dhigtay inay labada kooxood ku kala baxaan barbaro 3-3 ah ka hor kulanka Arbacada danbe ee Etihad Stadium ka dhacaya ee lugta labaad.
