Dhoobley(Idaacadda Sanguuni)-Kaddib barbardhac ay kulankii furitaanka ee xilli ciyaareedka lasoo galeen Rayo Vallecano, Barcelona ayaa intaas kaddib la celin la’yahay oo guulo xidhiidh ah soo waday tartamada oo dhan.
Barcelona ayaa toddobaadkan guul kale oo 4-0 ah kasoo gaadhay Cadiz kulan ay iskugu diyaarinayso dhigeeda Bayern Munich oo ay booqanayaan Champions League.
Xavi ayaa labadii kulan ee ugu dambeeyay ee Cadiz iyo Victoria Plazen doortay inuu isbedelo ku sameeyo shaxdiisa si uu u hubiyo inuu heerka ugu xoogan kaga hortagi karo Bayern.
Goolhaye Ter Stegen ayaa isagu booskiisa huba halka lagu wado in Jules Kounde daafaca midig kaga soo hormaro Hector Bellerin iyo Sergi Roberto.
Ronald Araujo ayaa daafaca dhexe joogto ka ah waxaana uu Javi Miguel sheegayaa in Eric Garcia la midoobi doono walow uu kulankii hore ee Champions League ciyaaray Christensen.
Alejandro Balde ayaa haatan ah dookha koowaad ee daafaca bidix, haddii uu Xavi khibrad doorbido kulanka Bayern ayuu Jordi Alba iyo Marcos Alonso midkood kusoo bilaabi doonaa waana booska ugu horreeya ee aan wali la go’aamin daafaca bidix.
Khadka dhexe ayaa ah mid xidhan haatanba oo ay kusoo wada bilaaban doonaan Gavi, Pedri iyo Sergio Busquets taas oo ka dhigan inay keydka soo fadhiisan doonaan Franck Kessie iyo Frankie De Jong.
Saddexda boos ee weerarka ayay xidhan yihiin labada boos ee Ousmane Dembele iyo Raphinha waxaana booska kale ku tartami doona Raphinha oo ciyaari doona haddii Xavi 4-3-3 ku ciyaaro amaba De Jong oo ciyaari doona haddii Xavi 4-4-2 ku ciyaaro.
