Dhoobley(Idaacadda Sanguuni)-Kooxda kubadda cagta Barcelona ayaa dib u heshay saddex ciyaartoy oo muhiim ah ka hor kulanka adag ee El Clasico ee Sabtida ay ku martigelinayaan Real Madrid, kuwaas oo culays badan oo dhinaca xulashada ah ka fudaydinaya tababare Xavi Hernandez.
Tababarka Barcelona ayaa waxa maanta kusoo laabtay saddexda ciyaartoy ee Robert Lewandowski, Frenkie De Jong iyo Raphinha oo muddo dhaawacyo gua maqnaa garoomada.
Xavi Hernandez ayaa la tashan doona dhakhaatiirta kooxdiisa, sidoo kalena waxa uu ku go’aan qaadan doonaa tababarka maalinta Jimcaha ay samayn doonaan ciyaartoydiisu, halkaas oo uu ka go’aamin doono haddii ay saddexdan laacib taam u noqonayaan iyo haddii kale.
Saddex ciyaaroy oo kale ayaa illaa hadda aan tababarka kusoo laabanin, waana Pedri, Jules Kounde iyo Sergi Roberto oo iyaguna dhaawacyo ah.
Wargeyska Sport ee xaruntiisu tahay magaalada Barcelona, ayaa sheegay, in Raphinha uu dib ugu soo laabtay tababarka buuxa laakiin ay dhakhaatiirtu kormeerayeen oo waxyaabaha qaarkood aan loo ogolaanin illaa hadda, halka Robert Lewandowski iyo Frenkie De Jong ay iyagu si dhamaystiran u qaateen.
Joao Felix oo ay jug kasoo gaadhay ciyaartii UEFA Champions League ee Shakhtar Donetsk ee Salaasadii ayaa sidoo kale tababarka joogay isaga oo kasoo kabtay jugtii xalay soo gaadhay.
