Dhoobley(Idaacadda Sanguuni)-Rikoodh cusub oo aanay cid hore samaynin ayaa caawa loo diiwaangeliyey weeraryahanka reer Norway ee Erling Haaland, kaddib markii uu gool ka dhaliyey West Ham United ciyaartii ay 3-0 ku karbaasheen ee ka dhacday garoonka Etihad Stadium.
Haaland ayaa jabiyey rikoodhkii wada-jirka ugu yaallay halyeeyadii Ingririiska ee Andy Cole iyo Alan Shearer ee goolasha ugu badan ee horyaalka Premier League laga dhaliyo hal xilli-ciyaareed gudihii, waxaana hadda ciyaartoygii abid ugu goolasha badnaa noqday Erling Haaland.
Baas qurux badan oo uu ka helay Jack Grealish ayaa uu Erling Haaland weydaariyey Lukasz Fabianski, waxaana uu noqday goolkiisii 35aad ee xilli-ciyaareedkan uu ka dhaliyo horyaalka Premier League, waana dhacdo ugub ah iyo wax aanay cidina hore u samaynin.
28 sannadood oo ay Andy Cole iyo Alan Shearer haysteen rikoodhka gool-dhalinta ugu badan ee horyaalka oo 34 gool ahayd, waxa caawa dhaafay Erling Haaland oo 35 gool dhaliyey, iyadoo waliba ay kooxdiisa u hadhsan yihiin shan ciyaarood oo kale oo horyaalka ah oo uu sii dheeraysan karo rikoodhkii gool-dhalinta.
