Dhoobley(Idaacadda Sanguuni)-Kooxda kubadda cagta Real Madrid ayaa weerar ku qaadaysa Liverpool oo markeeda horeba ku jirtay dhibaato weyn, waxaanay doonayaan inay kala soo wareegaan xiddig laf-dhabar u ah qorshaha tababare Jurgen Klopp balse waqtigan dhaawac u jiifa oo aanu mustaqbalkiisu sugnayn.
Real Madrid ayaa waxay raadinaysaa ciyaartooyo afka hore ee weerarka ah oo aanay lacag badan ku bixin amaba si bilaash ah ugu soo wareega, waxaana hadda diiraddooda soo galay oo ay doonayaan inay Anfield kasoo qafaashaan xiddiga reer Brazil ee Roberto Firmino.
31 jirkan oo qandaraaskiisa Anfield uu ku egyahay dhamaadka xilli ciyaareedkan, ayaa la sheegay in Real Madrid ay ka go’an tahay inay si xor ah kula soo wareegaan marka uu furmo suuqa iibka ciyaartoyda ee xagaaga, si uu beddel ugu noqdo Karim Benzema oo ay da’diisu tahay 35 jir.
Firmino oo Liverpool ay £29 milyan oo Gini kaga soo iibsatay Hoffenheim sannadkii 2015, ayaa waxa uu ka caawiyey Reds inay ku guuleysato toddoba koob oo ay ku jiraan Champions League iyo Premier League, waxaanay dadka qaarkood ku tilmaamaan inay qaab ciyaareedka iskaga dhow yihiin Karim Benzema.
Sida uu qoray wargeyska Defensa Central, Real Madrid waxay si dhow ula socotaa xaaladda Firmino iyagoo ogsoon inuu xor ka noqonayo Anfield xagaaga, waxaana laacibkan taageere u ah Carlo Ancelotti oo doonaya inuu keeno Santiago Bernabeu.
Inkasta oo uu Firmino dhowaan sheegay inuu ku faraxsan yahay inuu sii joogo Anfield, ayaa sida uu wariyaha Sky Sports ee Florian Pletterberg uu sheegy waxay Liverpool u diyaarinaysaa heshiis cusub oo soconaya illaa sannadka 2025.
Si kastaba ha ahaatee, Roberto Firmino ayaa 107 goolu dhaliyey Liverpool, 78 kalena caawiyey 348 kulan oo uu u saftay intii uu joogay Merseyside.
