Dhoobley(Idaacadda Sanguuni)-Real Madrid ayaa ugaadhsan doonta xiddig kasoo baxay kulliyadda da’yarta Barcelona ee La Masia oo si fudud uga baxsaday, kaas oo uu tababare Carlo Ancelotti dalbaday in xagaaga soo socda la keeno Santiago Bernabeu si ay iskaga xoojiyaan boosaska ay hadda diciifka ka yihiin.
Real Madrid ayaa la filayaa inay saxeexyo dhawr ah samayso iyadoo tiro ciyaartooyo waaweyn ah lala xidhiidhinayo sida Jude Bellingham, Alphonso Davies, Kylian Mbappe, Vlahovic iyo kuwo kale.
Sida ay warbaahinta Spain sheegtay maanta, Carlo Ancelotti ayaa waxa uu dalbaday in kooxda laga xoojiyo booska difaaca bidix ee uu xalay ka dhaawacmay David Alaba, horena uu uga sii maqnaa Ferland Mendy kaas oo uu si ku-meelgaadh ah uga dheelayo Nacho Fernandez.
Ancelotti ayaa waxa uu calaamadsaday midhihii kulliyadda La Masia ee Barcelona ee Alejandro Grimaldo oo hadda u ciyaara kooxda reer Portugal ee Benfica oo uu wacdaro ka dhigayo.
27 jirkan oo sidoo kale ay doonayaan Juventus, Newcastle United iyo Leeds United, ayaa waxa la sheegay in Real Madrid ay ku dedaali doonto sidii ay ku keeni lahayd Santiago Beranbeu oo sidoo kale uu kusoo waajan yahay Ferran Garcia oo difaaca bidix uga ciyaara Rayo Vallecano oo xagaaga dib ugu soo noqon doona Madrid.
Alejandro Grimaldo oo u dhashay waddanka Spain ayaa 287 ciyaarood oo uu u saftay Benfica waxa uu u dhaliyey 24 gool iyo 58 kale oo uu caawiyey, waxaana uu isku darsaday difaacis fiican iyo hal-abuur uu qayb ka qaato weerarka.
