Dhoobley(Idaacadda Sanguuni)-Kooxda kubadda cagta Real Madrid ayaa lagu bahdilay garoonkeeda Santiago Bernabeu, waxaan laba-jeer ka daba timid Villarreal oo waqti dambena keentay gool suuxiyey Real Madrid oo saddex dhibcood ay kaga xoogeen.
Real Madrid ayaa laba jeer hoggaanka u qabatay ciyaarta, waxaana waqti horeba ay u dabbaal-dageen gool uu isku qabtay difaaca reer Spain ee Pau Torres, balse waxa gool qurux badan oo difaaca uu burburiyey ku barbarreeyey xiddiga reer Nigeria ee Samuel Chukwueze ka dhaliyey isla qaybta hore.
Los Blancos oo isha kusii haysay ciyaarta Chelsea ee Arbacada ee lugta hore ee wareegga siddeeda Champions League, ayaa mar kale hoggaanka kusoo laabatay bilowga qaybta dambe, waxaana saddex daqiiqadood oo kaliya markii ay socotay goolka labaad u saxeexay Vinicius Junior.
Carlo Ancelotti oo lix isbeddel ku sameeyey shaxdii uu Arbacadii kusoo karbaashay Barcelona, ayaa waxa uu sameeyey isbeddello uu ka shalaayey, waxaanu saaray Karim Benzema iyo David Alaba oo bixitaankoodu uu burbur ku keenay.
Xiddiga dhuunta u galay Real Madrid ee ay ka ledi waayeen, mar kalena shabaqooda soo tabtay ayaa ahaa Samuel Chukwueze oo kubbad uu bannaanka ka toogtay ku hubsaday shabaqa uu waardiyaha ka ahaa Thibaut Courtois oo dabado kalena ka badbadiyey.
Natiijadan ayaa ka dhigan in Real Madrid ay horyaalka u hannaystay Barcelona oo ka horreysa 12 dhibcood laakiin haddii ay habeen dambe badiso tegi doona 15 dhibcood oo nadiif ah xilli toban ciyaarood ka hadhsan yihiin dhamaadka xilli ciyaareedkan.
