Dhoobleey(Idaacadda Sanguuni)-Real Madrid ayaa guul ay u qalantay ka heshay Real Sociedad oo marti ugu ahayd garoonka Santiago Bernabéu, kaddib markii ay kaga adkaatay 4-1, kulan ka tirsanaa horyaalka La Liga ee dalka Spain.
Qeybta hore ee ciyaarta ayaa lagu kala nastay 2-1 ay ku hoggaamineysay kooxda Real Madrid.
Daqiiqadii 10-aad kooxda martida ahayd ee Real Sociedad ayaa loo dhigay rigoore waxaana gool ka dhigay laacibkooda Mikel Oyarzabal, ciyaarta ayaa waxay sidaas ku noqotay 0-1.
40 daqiiqo marka ay dheesha mareysay Real Madrid ayaa dhalisay goolka barbardhaca waxaana 1-1 ka dhigay Camavinga kaddib markii uu caawinta goolka ka helay laacibka khadka dhexe ee Modric.
Luka Modrić ayaa daqiiqadii 43-aad hoggaanka u dhiibay kooxdiisa Real Madrid wuxuuna dheesha ka dhigay 2-1.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
Daqiiqadii 76-aad Real Madrid ayaa loo dhigay rigoore waxaana qaatay oo gool ka dhigay weeraryahankooda K. Benzema, ciyaarta ayaa waxay sidaas ku noqotay 3-1.
79 daqiiqo marka ay dheesha mareysay M. Asensio oo badel ku soo galay ciyaarta ayaa wuxuu ka dhigay 4-1, kaddib markii ay caawinta goolkan uu ka helay saaxiibkiis Carvajal.
Ugu dambeyntii ciyaarta ayaa waxay ku dhammaatay 4-1 ay kaga adkaatay Real Madrid kooxda Real Sociedad oo marti ugu ahayd garoonka Santiago Bernabéu, Los Blancos ayaa ku hoggaamineysa miiska kala sareynta horyaalka La Liga 63 dhibcood, iyadoo kooxda kaalinta ku jirta ee Sevilla ay ka sareyso 8 dhibcood.
