(England) 17 Agoosto 2020. Weeraryahanka kooxda kubadda cagta Liverpool ee Sadio Mane ayaa ku guuleystay abaalmarinta xiddiga sanadka Premier League oo ay bixiyaan taageerayaasha ee la yiraahdo PFA Fans’ Player of the Year award.
Xiddiga xulka qaranka Senegal ayaa bandhig cajiib ah sameeyay xilli ciyaareedkan 2019/20, waxaana uu dhaliyay 18 gool, isagoo caawiye ka ahaa 7 kale, taasoo ka caawisay Reds inay ku guuleysato horyaalka Premier League oo ay ku qaadaan dhibco rikoorka kooxda ah oo dhan 99 dhibcood.
Sadio Mane ayaa codadkii ay dhiibteen taageerayaasha waxa uu helay 41%, waxaana uu abaalmarintan ku garaacay laacibka qadka dhexe ee Manchester City Kevin De Bruyne iyo xiddiga ay isku kooxda yihiin ee Trent Alexander-Arnold.
Abaalmarinta oo lagu bixiyo codka taageerayaasha waxaa kaalinta labaad ka galay Kevin De Bruyne oo helay 27% codadkii la dhiibtay, waxaana kaalinta saddexaad ku dhameystay daafaca reer England ee Trent Alexander-Arnold oo helay codad dhan 17%.
Si kastaba ha noqotee, abaalmarintan ayaa sanadkii la soo dhaafay ee 2019 waxaa ku guuleystay xiddiga xulka qaranka Belgium ee Eden Hazard oo markaas ka tirsanaa kooxda Chelsea.
Gool FM.
