Dhoobleey(Idaacadda Sanguuni)-Xiddiga reer Brazil ee Roberto Firmino ayaa ugu dambayn noqday ciyaartoy ka tirsan kooxda Al-Ahli ee waddanka Sucuudiga oo uu si xor ah ugu biiray, waxaana ay kooxdaasi si rasmi ah ugu dhawaaqday heshiiska laacibkan caawa oo ay Arbaca soo gelayso.
31 jirkan oo uu qandaraaskiisa Liverpool ku ekaa bishii June ayaa waxa uu waddanka Sucuudiga kaga daba tegay ciyaartooyo badan oo horyaalka Premier League ay ka wada dheeli jireen sida Edouard Mendy, Cristiano Ronaldo, N’Golo Kante iyo kabtankii Real Madrid ee Karim Benzema.
Inkasta oo aanay Al-Ahly si rasmi ah u shaacinin, Roberto Firmino ayaa mushahar iyo xaqal qalin u qaadan doona lacag ka badan 100 milyan oo Euro, waxaana uu ku biirayaa liiska ciyaartoyda ugu mushaharka badan adduunyada.
Ciyaartoyda kooxdiisa cusub ee Al-Ahly ayaa dabbaal-deg kusoo dhoweeyey Roberto Firmino, waxaanay sameeyeen dabbaal-deggii uu isha is-qabanayey marka uu goolasha u dhaliyo Liverpool.
Siddeed sannadood oo uu joogay Liverpool ayuu kula guuleystay toddoba koob, isaga oo 362 ciyaarood oo uu u saftay u dhaliyey 111 gool iyo 79 kale oo uu caawiye ka noqday, waxaanay koobabkaasi kala yihiin Premier League, FA Cup, EFL Cup, Champions League, UEFA Super Cup, iyo Club World Cup.
