Dhoobley(Idaacadda Sanguuni)-Difaaca kooxda kubadda cagta Manchester United ee Raphael Varane ayaa daboolka ka qaaday shan sababood oo uu ku doortay Red Devils oo uu sannadkii 2021 uga soo wareegay kooxda reer Spain ee Real Madrid oo uu wax kasta kula soo guuleystay.
Varane ayaa soo afjaray toban sannadood oo uu u ciyaarayay Real Madrid, waxaana uu doortay inuu qayb ka noqdo kooxdii tababare Ole Gunnar Solskjaer halka uu sannadkii labaad hadda kula qaadanayo Manchester United horyaalk.
Raphael Varane oo inta badan xiilli ciyaareedkan u jiifay dhaawac ayaa kaliya u saftay United 22 ciyaarood oo horyaalka ah, waxaana aan la hubin in uu soo laaban doono afarta ciyaarood ee muhiimka ah ee uga hadhsan dhamaadka xilli-ciyaareedka ee ay u baahan yihiin inay guuleystaan si ay ugu dhamaystaan afarta sare.
Daafaca reer France oo la weydiiyey sababtii keentay inuu iskaga tago Real Madrid oo uu ku biiro Manchester United sannadkii 2021, ayaa ku jawaabay: “Waxay ii ahayd waqti wanaagsan. Man United waa koox weyn oo haysata qaar ka mid ah taageereyaasha ugu wanaagsan adduunyaada, waxaanay leedahay taariikh cajiib ah.
“Wax kasta oo ku saabsan kooxdu way wanaagsan yihiin, waxaana ka mid ahaa falsafadda, samirka ay leedahay kooxdu, niyadda ay hayaan, in ay yihiin koox ka duwan [Real Madrid]. Waxa kale oo aan jeclaa garamada kooxda markii aan iskuulka dhigan jiray. Waxa an jecelahay midabka, marka aan xidhana waxa aan dareemaa in 100% ayan wax walba ugu hurayo garoonka dhaxdiisa.
“Isma dhiibi karayo, marka aan xidhanahay garankanna waxa aan dareemaa maskaxdaas.”
