Dhoobleey(Idaacadda Sanguuni)-Tababaraha Manchester United Ralf Rangnick ayaa ammaanay xiddiga kooxda Cristiano Ronaldo, kaddib guushii ay maanta ka gaareen naadiga Crystal Palace.
Manchester United ayaa 1-0 guul kaga gaartay kooxda Crystal Palace oo marti ugu ahayd Old Trafford, ciyaar qeyb ka ahayd kulammada Isbuuca 16-aad ee horyaalka Premier League.
Rangnick ayaa u suurtagashay inuu guul la gaaro Manchester United kulankiisii ugu horeysay kaddib markii uu la wareegay masuuliyada kursiga tababarnimo ee garoonka Old Trafford.
Wargeyska Mirror ee dalka England ayaa wuxuu shaaca ka qaaday wareysi uu bixiyay tababaraha kooxda Manchester United Ralf Rangnick, wuxuuna yiri:
“Waxaan xakameynay ciyaarta oo dhan, iyo inaan ilaashano shabaqeena oo nadiif ah, waxay ahayd qaybta ugu muhiimsan.”
Tababaraha reer Jarmal iyo kooxda Red Devils oo hadalkiisa sii wata ayaa yiri:
“Waxaa jira waxyaabo ay tahay inaan horumarino, waxaana u baahanahay inaan ilaashano shabaqeena oo nadiif ah, hal tababar oo kaliya ayaan runtii la dhacay, waxaan sameynay wax aad uga wanaagsan sidii la filayay.”
“Waxaan dooneynay inaan ku ciyaarno labo weeraryahan, gaar ahaan dhanka weerarka, xaqiiqdii shaqada Ronaldo waxay ahayd mid cajiib ah.” ayuu yiri Ralf Rangnick mar uu ka hadlayay Cristiano Ronaldo.
