Dhoobley(Idaacadda Sanguuni)-Duqeymo ay fuliyeen diyaaradaha dagaalka Israa’iil ayaa saacadihii la soo dhaafay si xooggan uga socday magaalada Qasa, gaar ahaan nawaaxiga xaafadaha Jabalia, al-Nazla, al-Sabra, iyo al-Zeitoun, iyadoo weli la dareemayo fal-celinta ku saabsan go’aanka rasmiga ah ee lagu shaaciyey macluul ka jirta marinka Qasa.
Ilo caafimaad ayaa maanta ku dhawaaqay in tirada dadka ku dhintay Marinka Qasa ay gaartay 62,622 tan iyo markii dagaalku bilowday bishii Oktoobar 2023, kuwaas oo intooda badani ay yihiin haween iyo carruur.
Sidoo kale, ilo-wareedyo ayaa u sheegay wakaaladda wararka Falastiin ee WAFA in tirada guud ee dadka waxyeelladu soo gaartay ay gaartay 157,673, halka weli meydad badan ay ku hoos jiraan burburka, kuwaas oo aan wali wax laga qaban karin sababo la xiriira xaalada amaan iyo baahida qalab ee haysta ambalaasyada iyo kooxaha gurmadka rayidka.
Waxaa sidoo kale la sheegay in 61 qof ay dhinteen, halka 308 kalena ay ku dhaawacmeen 24-kii saac ee lasoo dhaafay, kuwaas oo la geeyay isbitaalada Qasa.
