Dhoobley(Idaacadda Sanguuni)-Weeraryahanka kooxda Juventus ee Cristiano Ronaldo ayaa xalay ku guuleystay abaalmarin kale oo shaqsi ah kaddib markii loo doortay xiddigii ugu fiicnaa horyaalka Serie A sanadkii tagay ee 2020 kaddib cod laga qaaday ciyaaryahanada, garsoorayaasha iyo tababarayaasha.
Cristiano ayaa abaalmarinta loo gacan geliyay kaddib markii uu sanadkaas 33 kulan oo uu horyaalka ka ciyaaray Bianconeri ugu soo dhaliyay 31 gool isaga oo u sahlay ku guuleysiga Scudetto kale.
Ronaldo ayaa kaddib hanashada abaalmarintaas yidhi “Waxaan jeclaan lahaa inaan u mahadceliyo xiddigaha aanu isku kooxda nahay ee suurogal ka dhigay midan iyo dhammaan ciyaaryahanada ii coddeeyay”
“Joogtaynta, kalsoonida ku jirta awoodayda, shaqada adag iyo xamaasada aan u hayo ciyaartu waa siraha ku raaxaysiga kubadda cagta, sidoo kale dhiirigelinta iyo nidaamsanaanta kuwaas oo la’aantood aanad ka fikiri karin inaad sii wado ciyaarista kubadda cagta marka aad jirto 35, 36 ama 40”
Cristiano Ronaldo ayaa sidoo kale intii ay munaasibadaasi socotay u doortay goolkii uu ka dhaliyay Sampdoria madaxii ugu fiicnaa ee uu dhaliyay waayihiisa ciyaareed.
“Kaasi waxa uu ahaa madaxii ugu fiicnaa noloshayda, wax shaki ahi kuma jiro midaas” ayuu yidhi Cristiano oo ka hadlayay goolkiisaas mucjisada ahaa.
Sidoo kale shaxdii ugu fiicnayd sanadkaas Serie A ayaa loo doortay xiddigahan: Donnarumma, Gosens, Stefan De Vrij, Bonucci, Theo Hernandez, Luis Alberto, Nicolo Barella, Papu Gomez, Paulo Dybala. Ciro Immobile iyo Ronaldo.
