Dhoobleey(Idaacadda Sanguuni)-Tababaraha kooxda Manchester City ee Pep Guardiola ayaa xaqiijiyay in aysan waxba iska bedelin tartanka ay kula jiraan ku guuleysiga horyaalka Premier League naadiga Liverpool.
Manchester City oo saddexda dhibcood si raaxo leh kaga heshay Watford oo marti ugu ahayd garoonka Etihad, kaddib markii ay kaga adkaatay 5-1, kulan ka tirsanaa horyaalka Premier League, xilli Gabriel Jesus uu dhaliyay 4 gool.
Shabakada “Sky Sports” ayaa baahisay wareysi uu bixiyay Pep Guardiola kaddib ciyaarta, waxaana hadaladiisa ka mid ahaa:
“Haddii uu jiro qof wax walba u qalma, waa Gabriel Jesus.”
“Aad ayaan ugu faraxsanahay Jesus, si kasta oo uu u ciyaaro, mar walba wuu dagaalamaa, wuxuuna caawiyaa saaxiibadiisa.”
Tababaraha kooxda Manchester City ee Pep Guardiola ayaa mar uu ka hadlayay tartanka loogu jiro hanashada horyaalka Premier League, wuxuu yiri:
“Wax isbedel ah ma jiraan, kaddib markii aan garaacnay Brighton, waxaan 2 dhibcood ka hooseynay Liverpool kulan kahor, hadda waxaan ku hogaamineynaa 4 dhibcood.”
“Kulankii Brighton wuxuu ahaa final oo kale, maantana waxaa kulan kale oo final ah la ciyaarnay Watford, waana ku guuleysanay, hadda waxaan fursad u haysanaa inaan finalkale la ciyaarno Leeds United, ma jiraan wax isbedel ah, waa inaan badinaa dhammaan kulamada soo socda, si aan ugu guuleysano horyaalka.”
