Dhoobley(Idaacadda Sanguuni)-Tababaraha kooxda Manchester City ee Pep Guardiola ayaa qirtay in Arsenal ay ka fiicneyd Citizens, inkastoo kooxdiisa ay badisay.
Manchester City ayaa guul soo laabasho ah kaga soo gaartay 10 xiddig oo kooxda Arsenal ah garoonka Emirates, kaddib markii ay kaga soo adkaatay 1-2, ciyaar qeyb ka ahayd kulammada toddobaadkan ee horyaalka Premier League.
Tababaraha kooxda Manchester City ee Pep Guardiola ayaa kaddib ciyaarta u sheegay warbaahinta:
“Arsenal way fiicneyd, waxaan wajahnay koox ku dhibtooneysay sanadihii ugu dambeeyay inay ka mid noqdaan afarta sare, xilli ciyaareedkan waxay ku bilowdeen meel hoose.”
“Waxay heyteen lix maalmood kaddib guushii ay ka gaareen Norwich City, anagana waxaan heysanay laba maalmood, way nagu adkeyd inaan dib u laabano.”
“Ma haysan awood, taasina waa sababta aan ugu ciyaarnay xiddig dheeri ah khadka dhexe si aan u helno koontarool badan iyo baas, waxaan ogeyn inay ku adkaan karto gudbinta iyo awood jireed iyaga.”
“Waxaan isku daynay hal daqiiqo gudaheed waxaan helnay rigoore ka dibna kaarka cas, waan ognahay waxa ay ka dhigan tahay inaan halkan ku garaacnay Arsenal xilligan oo ay ku jiraan, hadda waxaan heysanaa waqti aan ku nasano.”
