Dhobley(Idaacadda Sanguuni)-Harry Maguire ayaa hor yimid warbaahinta isaga oo ah xiddigii ugu fiicnaa garoonka muddo dheer oo uu ku dhibaataysnaa garoonka Old Trafford kaddib, isaga oo bandhig heersare ah ka sameeyey ciyaartii guusha cidhiidhiga ah ay ka gaadheen Sheffield United.
United oo hoggaanka uu u dhiibay Scott McTominay daqiiqaddii 28aad ayaa ogolaatay in laga dhaliyo gool, balse Diogo Dalot ayaa noqday laacibka go’aamiyey saddexda dhibcood ee Red Devils oo sare ugu soo dallacday kaalinta siddeedaad, iyaga oo lix dhibcood ka dambeeya Man City oo hoggaanka haysa.
Tababare Erik ten Hag ayaa la hadlay ciyaartoyda kooxdiisa oo murugaysan waqtigii nasashada, sababtoo ah waxa gilgishay geerida waqti yar ka hor loo sheegay ee ahayd in uu dhintay helyeygii kooxdooda ee Sir Bobby Charlton.
Harry Maguire oo ay saxaafaddu weydiisay wixii qolka labbiska uu ugu sheegay tababare Erik ten Hag, ayaa ku jawaabay: “Waxa aanu dareemaynay in aanu ciyaarta maamulaynay 30kii daqiiqadood ee ugu horreeyey, tababaruhuna waqtigii nasashada waxa uu nagala hadlay in aanu u baahanahay in aanu in badan maamulno ciyaarta, si aanu guul u keeni karno.
“Waxay ila tahay in qaybtii labaad aanu fiicnayn, bandhig xooggan samaynay oo aanu dareennay in goolku imanayo, waxa uu ahaa gool qurux badan oo guusha na siiyey iyo ciyaar aanu ku raaxaysanaynay dhamaadkeedii, wiilashuna shaqo fiican ayay qabteen.”
