Dhoobley(Idaacadda Sanguuni)-Kooxda West Ham United ayaa dalab rasmi ah ka gudbisay daafaca dhexe ee Manchester United ee Harry Maguire iyagoo isla markiiba jawaab degdeg ah helay.
Sida uu sheegayo wargeyska The Athletic, West Ham dalabka ay shalay Jimcihii ka gudbisay Harry ayaa ah 20 Milyan oo pound balse waxa degdeg jawaab diidmo ah usoo bixisay Manchester United.
Marka laga yimaado inuu kursiga keydka deris la ahaa xilli ciyaareedkii tagay oo uu kaliya siddeed kulan Premier League kusoo bilawday isla markaana laga qaaday masuuliyadii kabtanimo haddana Maguire ayaa doonaya inuu sii joogo Old Trafford oo u dagaalamo booskiisa.
The Athletic ayaa intaas ku daraya inaan la filayn in West Ham dalab labaad gudbiso sababtoo ah mushaharka badan ee ciyaaryahanka iyo rabitaankiisa ah inuu kooxdiisa sii joogo.
Maguire oo heshiiskiisa Man United dhacayo xagaaga 2025 ayaa loo sheegay in Euro 2024 aan la hubin haddii uu boos ka heli doono xulka England haddii uusan boos joogto ah ka helin kooxda uu joogo.
West Ham ayaa doonaysa inay safkeeda soo xoojiso kaddib markii ay lumisay kabtankeedii Declan Rice oo heshiis rekoodh ah ugu wareegay Arsenal.
