Dhoobley(Idaacadda Sanguuni)-Mohamed Salah ma jabin kaliya hal rekoodh balse seddax rikoor ayuu jabiyay isaga oo Liverpool dhibic u keenay kulankii Manchester United.
Dhibcaha ayaa lagu wadaagay garoonka Old Trafford iyadoo Man United iyo Liverpool ay wada ciyaareen Axadii kulan xiisa badan oo ku dhamaaday barbaro 2-2 ah.
Salah ayaa Liverpool rigoore ugu barbareeyay dhamaadkii ciyaarta, waxaana goolkaas ku jabiyay seddex rikoodh.
Rikoodhka ugu horeeya, Salah waxa uu noqday xiddiga goolasha ugu badan ka dhaliyay Manchester United taariikhda Premier League isagoo ka dhaliyay 11 gool, wuxuu rikoodhkaan kala wareegay Alan Shearer oo United ka dhaliyay 10 gool.
Kan labaad, waxa uu Salah lix gool oo horyaalka ah ku dhaliyay Old Trafford, waa ciyaaryahanka ugu badan taariikhda horyaalka ee garoonka Old Trafford goolal ku dhaliya, wuxuu rikoodhkaan ka qaaday Steven Gerrard oo shan gool ku dhaliyay Old Trafford.
Kan seddexaad, xiddiga Liverpool waa ciyaaryahankii ugu horeeyay ee Man United shabaqa ka soo taabta afar kulan oo isku xigta oo marti loogu ahaa Old Trafford horyaalka.
Goolka Salah uu ka dhaliyay Red Devils waxay ka dhigeysaa goolkiisii 16aad ee xilli ciyaareedkan horyaalka, kaliya Ollie Watkins (18) iyo Erling Haaland (19) ayaa dhaliyay goolal ka badan.
Dhanka miiska kala sareynta Liverpool ayaa ku guuldareysatay inay hogaanka ku soo laabato, waxay ku jiraan kaalinta labaad iyagoo 71 dhibcood la wadaaga kooxda Arsenal oo hogaanka heysa.
Man City ayaa kaalinta seddexaad ku jirta iyagoo hal dhibic ka danbeeya labada kooxood.
