Dhoobley(Idaacadda Sanguuni)-Halyeeyga Tottenham ee Darren Bent ayaa ammaanay saaxiibkiisii hore ee Luka Modric, kaddib heerarkiisii fiicnaa ee dhawaanahan uu ka sameeyay kooxda Real Madrid.
Luka Modric ayaa u suuragaliyay kooxda kubadda cagta Real Madrid inay gaarto wareega Afar dhammaadka UEFA Champions League kaddib markii ay ka cirib tireen naadiga Chelsea.
TalkSport ayaa shaacisay ammaanta uu Halyeeyga Tottenham ee Darren Bent u jeediyay saaxiibkiisii hore ee Luka Modric, wuxuuna yiri:
“Waxaan arkay ciyaartoy badan oo u tagay Real Madrid oo ku guuldareystay, laakiin wuxuu sii waday inuu noqdo mid ka mid ah kuwa ugu fiican kaliya ma ahan jiilkeena laakiin gabi ahaanba marka la eego ciyaartoyda khadka dhexe.”
“Marka aad ka hadleyso isaga, waxa uu ku guuleystay afar koob oo Champions League-ga ah, waxaana uu ku guuleystay inuu jabiyo ismari-waaga ah abaal-marinta Ballon d’Or, isagoo helay hal mar.”
“Wuxuu u soo saaray Croatia finalka Koobka Adduunka, welina wuxuu u muuqdaa mid heer sare ah, ma wuxuu jiraa soddon iyo lix sano? Waa ciyaaryahan fiican.”
Bennett ayaa sheegay in Modric uu wacdaro ka dhigay tababarka Tottenham inkasta oo uu ku dhibtoonayay bilawgii xirfadiisa ciyaareed ee kooxda, wuxuuna yidhi.
“Wuxuu ahaa mid aan la joojin karin tababarka, wuxuu u muuqday sida inuu lahaa 6 indhood.”
“Marka aad isku daydo inaad ka joojiso midigta, ama aad gadaal kaga timaado, wuxuu awoodaa inuu kubadda baaso.”
