Dhobley(Idaacadda Sanguuni)-Weeraryahanka kooxda Paris Saint-Germain ee Kylian Mbappe ayaa farriin hawada u mariyay saaxiibkiisii hore ee kooxdaas ee Lionel Messi oo ay dhalashadiisa ahayd shalay.
Messi ayaa iskaga baxay PSG kaddib laba sano oo uu ku qaatay gegida Parc des Princes isagoo ku dhawaaqay inuu ku biirayo kooxda Maraykanka ah ee Inter Miami.
Messi ayaa laba xilli ciyaareed Paris kula soo qaatay Mbappe iyo Neymar Jr balse waxay awoodi waayeen inay Champions League qaadaan.
Mbappe oo bartiisa Instagram farriin hawada ugu mariyay Leo ayaa u rajeeyay dhalasho wacan sidoo kalena wanaag uga rajeeyay waayihiisa ciyaareed ee cusub.
Kylian ayaa qoraalkiisa ku bilaabay “Dhalasho wacan hayeey, waxaan kuu rajaynayaa maalinta ugu wanaagsan inaad la qaadato qoyskaaga iyo asxaabtaada”.
“Waad ku mahadsan tahay labadan sano ee aynu Paris ku wada qaadanay, wax badan ayaan adiga kaa bartay ka ciyaaryahan ahaan, ka saaxiib ahaan, ka ciyaartoy iga soo horjeeda ahaan iyo ka nin ahaanba”.
“Intaas abaal ayaan kaaga hayaa, nasiib wacan ayaan kaaga rajaynayaa khibradaada cusub”.
Mbappe ayaa dhawaan si lamid ah Messi ka bixi kara albaabka PSG maadaama oo aysan kooxdu doonayn inay xagaaga dambe bilaash ku weydo xilli uu heshiis kordhina diiday.
Kylian ayaa lala xidhiidhinayaa markale kooxda ree Spain ee Real Madrid oo ay jirto suurogalnimo sarre oo uu xagaagan ugu biirayo.
