Dhoobley(Idaacadda Sanguuni)-Manchester United ayaa dalab 50 milyan euro ah ka gudbisay daafaca dhexe ee kooxda Barcelona Adreas Christensen.
Todobaadkii la soo dhaafay Man United ayaa dhameystirtay saxiixa weeraryahanka reer Denmark Rasmus Hojlund oo ay Atalanta uga soo iibsadeen 72 milyan ginni.
Hojlund waa saxiixii seddexaad ee xagaagan uu sameeyo Erik ten Hag ka dib Mason Mount iyo Andre Onana, waxayna haatan diiradooda saarayaan Sofyan Amrabat.
Si kastaba, United waxay sugeysaa in laga iibsado Harry Maguire iyo Eric Bailly, waxayna doonayaan inay adkeeyaan daafacooda.
Sida lagu sheegay jariirada Catalans ee El Nacional United ayaa dalab ka gudbisay daaficii hore ee Chelsea Christensen.
El Nacional ayaa sheegtay in United ay dalab wadar ahaan gaaraya 50 milyan euro ka gudbisay Christensen iyadoo 35 milyan euro ay tahay kaash halka 15 milyan euro ay ku xirnaan doonto bandhiga ciyaaryahanka.
27 jirkaan ayaa wacdarro u dhigayay Barcelona tan iyo markii uu ka soo wareegay Chelsea xagaagii hore isagoo si wacan uga garab ciyaaraya Ronald Araujo.
