Dhoobley(Idaacadda Sanguuni)-Daafaca Arsenal Jurriën Timber ayaa qirtay in kooxdiisu ay u baahan tahay nasiib si ay ugu guuleystaan horyaalka Premier League xilli ciyaareedkan.
“Aniga ahaan, marka jadwalka hore loo soo saaro waxaad is leedahay: waa billow adag.
Inta toddobaadka oo dhan waxa aan ka hadlaynay kaliya waa Manchester United, ma ahayn ciyaarta City. Xitaa Leeds ama Liverpool lagama hadlin. United waa koox ciyaartoy fiican heysata, tababare fiican, markasta waa adag tahay in la wajaho.” ayuu yiri Timber.
Wuxuu sii raaciyay:
“Waxa aan ku qancay waa sida Premier League u adag yahay. Koox walba sanad walba way sii xoogaysanayaan. United xilli viyaareedkii hore waxay ku dhameysteen kaalinta 14aad, haddana waxaad eegtaa kooxdooda oo waxaad is leedahay sidee taasi ku dhacday? Dad badan ayaa wax badan ka filaya. Chelsea si fiican ayey isu dhiseen, kooxo badan ayaa wanaagsan, sidaas darteed way adkaan doontaa.”
Timber ayaa sheegay in muhiimaddu tahay in Arsenal diiradda saarto nafteeda oo aysan is barbardhigin kooxaha kale:
“Waa inaan nafteena ku adkaysanaa oo aan aaminsanaanaa waxa aan qaban karno. Haddii kale, ma fiicnaan doonto innaga iyo cid kale midna.”
Arsenal oo saddex sano oo isku xigta ku dhammeysatay kaalinta labaad, ayaa suuqan xagaaga kasoo qaadatay ciyaartoy ay ka mid yihiin Viktor Gyökeres, Noni Madueke, Martin Zubimendi, Christian Norgaard, Cristhian Mosquera iyo goolhayaha Kepa Arrizabalaga. Timber ayaa qiray in culays weyn hadda saaran yahay ciyaartoyda Arteta.
